Shumë njerëz kur mendojnë për Filipinet kujtojnë mikpritjen e ngrohtë, buzëqeshjet e sinqerta ose pasionin për karaoke. Të gjitha këto janë të vërteta, por nuk janë e gjithë historia. Pas tyre fshihet një mozaik traditash, gjuhësh, zakonesh dhe vlerash që formësojnë identitetin e filipinasve dhe ne duam të të ftojmë t’i zbulojmë bashkë me ne.

Rrënjët që mbajnë gjallë identitetin

Para kolonizimit, filipinasit jetonin në “barangay”, komunitete të vogla të udhëhequra nga datu-t. Besonin në animizëm, ku çdo gjë në natyrë kishte shpirt. Këto rrëfime dhe rituale të lashta janë të ruajtura edhe sot, në mënyra të vogla por të fuqishme.

Kolonizimi spanjoll solli gjuhë, fe dhe arkitekturë që shihen edhe sot. Amerikanët sollën arsimin modern dhe gjuhën angleze, ndërsa periudha japoneze forcoi shpirtin rezistent të popullit. Sot, filipinasit po e përqafojnë këtë trashëgimi me krenari, duke ringjallur artizanatet, festivalet dhe historitë që i mbajnë rrënjët të gjalla.

Barangay, njësia më e vogël administrative në Filipine, e ngjashme
me një lagje ose komunitet lokal.

San Agustin Church (Manila) arkitektura baroke spanjolle

Një mozaik gjuhësh dhe shprehjesh

A e dije që Filipinet kanë mbi 170 gjuhë? Përveç tagalog dhe anglishtes, gjuhë si: cebuano, ilocano apo hiligaynon mbajnë gjallë identitetin rajonal. Kur njeh apo respekton këto gjuhë, bëhesh pjesë e një bote që shkon përtej komunikimit. Shprehje si “Bahala na” (besim dhe guxim përballë të panjohurës) ose proverba si “Kung ano ang puno, siya ang bunga” (Çfarë është pema, ajo është dhe fruti) tregojnë filozofinë e jetës dhe vlerat që kalohen brez pas brezi.

Festa, zakone dhe jeta në komunitet

Filipinasit nuk jetojnë vetëm për veten, por për njëri-tjetrin. Konceptet si “kapwa” (vetja në të tjerët) dhe “bayanihan” (ndihmë e ndërsjellë) tregojnë thelbin e shoqërisë së tyre. Festat si: Sinulog dhe Ati-Atihan janë kujtesë e rrënjëve dhe bashkësisë.

Nga artizanatet tradicionale, pëlhurat e endura dhe gdhendjet në bambu e deri te kuzhina e pasur me adobo, Bicol Express apo Kinilaw, çdo element i përditshëm është një histori që lidhet me identitetin.

Arti, muzika dhe krijimtaria moderne

Nga “kulintang” dhe “Tinikling”, tek artistët e rinj që ndërthurin pop, hip-hop dhe traditën, muzika filipinase është një udhëtim mes së kaluarës dhe së ardhmes. Njësoj ndodh edhe me artin: motivet e lashta ndërthuren me forma moderne, duke treguar se identiteti është i gjallë dhe në zhvillim.

Tinikling

Kulintang

Përtej stereotipeve

Ne duam që klientët tanë të ndihen të mirëpritur ashtu siç janë me gjithë kompleksitetin, pasurinë dhe historinë e tyre. Filipinasit janë të shumëllojshëm, të fortë dhe me rrugë jetësore unike. Kjo është ajo që e bën punën tonë të bukur: të ndihmojmë çdo individ të shkëlqejë në autenticitetin e tij.

Pra, nëse je kurioz të mësosh më shumë, eja bisedo me ne. Ne nuk jemi vetëm një agjenci rekrutimi, por një urë që të lidh me histori, kultura dhe njerëz të jashtëzakonshëm.

The post Kultura filipinase, përtej stereotipeve appeared first on Bliss Recruting Company.